Botimet ALSAR nxorën nga shtypi tre libra të autorit turk Adem Özköse, “I burgosuri”, “Udhëtimi” dhe “Autostop në xhennet”.

Gazetar për nga profesioni, ndjekës nga afër i krizave dhe luftërave në rajone të ndryshme, me përvoja dhe dramatike në punën e tij, Adem Özköse i ka shkruar këto libra për të rrëfyer realitetet ku është gjendur, historitë që ka dëgjuar, për të përcjellë përjetimet në udhëtimet e shumta nëpër botë.

“Ajo që kaluam pas rrëmbimit,” shkruan ai, për shembull, tek ‘I burgosuri’, ku tregon peripecitë e tij në Siri dekadën e shkuar, “në burgun e nëndheshëm, na njohu me një botë tërësisht të re. Ishte një botë e atillë që shpesh na bënte të turpëroheshim nga të qenit njeri…. E vetmja mënyrë për të mbijetuar në një burg nëntokësor ku mbizotëronte e keqja dhe tirania, ishte përqafimi i besimit dhe shpresës.”

Me botë të pasur shpirtërore, ai shkon përtej gazetarit në libër, duke përçuar emocione të vazhdueshme dhe duke krijuar ndjesi të ndryshme te lexuesi.

“Esir”, “Sefer” dhe “Cennete otostop”, në titujt origjinalë në turqisht, janë mes librave më të shitur të autorit, të sjellë mirë në shqip.

“NJOHJA, VLERA E PARË E ISLAMIT – kontribut teorisë së njohjes në Islam”, shkruar nga Reshid Hafizoviq, është nxjerrë në shqip nga Botimet ALSAR.

Vepra e sapodalë nga shtypi është një përkthim nga boshnjakishtja, me temë, siç sugjeron titulli, Islamin dhe teorinë e njohjes në të.

Autori, me një aktivitet të gjerë akademik në Sarajevë e më gjerë, ka shkruar një sërë veprash, i dalluar gjithashtu dhe për përkthime nga disa gjuhë të huaja.

Ky botim i ri paraqet interes për tematikën, duke e njohur në të njëjtën kohë lexuesin me një autor boshnjak të ditëve tona.

Botimet ALSAR do të vijojnë t’i paraqesin publikut autorë dhe tituj të rinj, në kërkim gjithmonë të së veçantës.

Sapo e ka parë dritën e botimit vepra, “Studim mbi teorinë e të drejtës islame”, e autorit Sava Pasha.

Botimet ALSAR kanë nxjerrë nga shtypi një vepër dyvëllimëshe dhe në dy gjuhë, në shqip dhe në origjinalin në frëngjisht. Ajo paraqet interes në shumë aspekte, si trajtesë e një teme me kompleksitet dhe ndjeshmëri të lartë, me një qasje historike, filozofike dhe jurisprudenciale, shkruar nga pozitat e një të krishteri.

Autori, Sava Pasha, sipas asaj çka shkruhet në jetëshkrimin për të dedikuar këtij botimi, dhe që mund të lexohet në nisje të vëllimit të parë, është një personalitet shumëdimensional, hera-herës edhe paradoksal; doktor në mjekësi, diplomat, nëpunës i lartë osman, i krishterë ortodoks për nga besimi, një intelektual i kalibrit ndërkombëtar me bindje pozitiviste dhe kozmopolite të karakterizuara nga përkatësi të shumëfishta kulturore, franceze, helene, turko-osmane dhe shqiptare.

Ndjenja e sinqertë e përkatësisë ndaj universit perandorak osman, ndjesia e gjallë e të qenit epirot shqiptar, respekti i thellë ndaj fesë islame dhe institucioneve të saj, sikundër dhe dashuria e pashtershme për kulturën dhe letrat greke, por edhe për kozmopolitizmin që zinte fill në një atashim të pathyeshëm ndaj gjuhës dhe qytetërimit francez, e karakterizuan të gjithë veprimtarinë dhe jetën e paklasifikueshme të shqiptarit Sava Pasha, e cila mbetet pak e studiuar në Turqi, përciptazi e trajtuar në Greqi dhe në Francë, dhe ende tërësisht e panjohur në Shqipëri.

Përtej temës, pra, qëllim i botimit është dhe njohja e publikut me një personalitet pak të njohur, në mos aspak, edhe pse me origjinë shqiptare. Dhe sa ka të bëjë me përmbajtjen, ndonëse Sava Pasha shprehet vetë se vepra është shkruar në mënyrën më të thjeshtë të mundshme, me dëshirën për ta bërë të kuptueshëm për të gjithë, ajo mund të mos jetë lehtësisht e përthithshme nga çdo lexues.

Në Fondacionin ALSAR bëri një vizitë drejtori i projekteve të WEFA-s, organizatës së ndihmave me qendër në Gjermani.

Z. Mehmet Bakıcı ia uroi mirëseardhjen kryetari i Fondacionit ALSAR, z. Mehdi Gurra, në zyrën e të cilit u zhvillua më pas një bisedë miqësore.

Thellimi i bashkëpunimit nëpërmjet projekteve të përbashkëta humanitare e mbizotëroi tematikën në bisedë. U diskutua për zgjerimin e projekteve dhe mundësitë për projekte të reja.

Trajtimi i perspektivave të ndërveprimit ishte pjesë e natyrshme e bisedës.

WEFA është një prej organizatave partnere të Fondacionit ALSAR, me një bashkëpunim të gjatë në fushën humanitare. Nëpërmjet projekteve të përbashkëta në vite janë ndihmuar shtresa të tëra në nevojë.

Qyteti bregdetar i Durrësit është bërë pritës i Kongresit Ndërkombëtar të Materialeve dhe Polimereve, një aktivitet shkencor i organizuar nga bashkëpunimi i disa institucioneve, organizma, universitete dhe shoqata të ndryshme.

Kongresi, i organizuar për të ndarë zhvillimet shkencore të lidhura me shkencën dhe teknologjinë e materialeve, mbahet çdo vit që nga 2017-ta. Temat e Kongresit të 6-të i përkasin kësaj fushe shkencore, për të cilat do të flasin një numër i konsiderueshëm kumtuesish nga vende të ndryshme.

Aktiviteti shkencor është përshëndetur nga shumë të ftuar, mes të cilëve kryetari i Fondacionit ALSAR, mbështetës i zhvillimit të Kongresit.

Mehdi Gurra do të thoshte në fjalën e tij përshëndetëse se, “Si kryetar i Fondacionit ALSAR, një mbështetës i vazhdueshëm i kësaj veprimtarie të suksesshme, kam bindjen se qëllimet për organizimin e këtij kongresi kanë për t’u përmbushur, ashtu si dhe në kongreset e mëhershme.”

Ndërsa theksoi se suksesin e këtij aktiviteti shkencor e dëshmon vijimësia e tij, ai shtoi: “Jetojmë në kohë ndryshimesh, sfidash dhe paqartësish të mëdha, lokale, rajonale, kontinentale dhe globale, mes tyre sociale dhe ekonomike, çka e bën më të kërkuar, më të nevojshëm dhe më të dëgjuar zërin e njerëzve të shkencës, prej të cilëve priten risi, novacione, dhënie zgjidhjesh shkencore.”

Përshëndetja e z. Gurra do të vijonte me fjalët, “Paraqitja e zhvillimeve shkencore në fushën për të cilën është mbledhur kongresi, shkëmbimi i gjerë i ideve, kumtesat e shumta, do të kenë me siguri produktin e tyre, prej nga përfitues do të jenë të gjithë, folës dhe dëgjues, pjesëmarrës në këtë sallë dhe lexues më tutje të materialeve të përgatitura enkas për këtu.

Kongresi do të hapë horizonte të reja, do të krijojë mundësi të reja, do të ushqejë njohje të reja dhe do të farkëtojë miqësi kolegësh. Për ne, mbështetësit e tij, është e rëndësishme që kongresi të zhvillohet në frymën e duhur, të jetë i dobishëm dhe t’u vlejë të gjithëve.”

“Fondacioni ALSAR e ka mbështetur me shumë dëshirë këtë kongres, një kontribut i vlerësuar me certifikatë mirënjohjeje nga organizatorët. E ka bërë këtë në kuadrin e vizionit dhe misionit të tij mbarëshoqëror, që, nga tre boshtet e tij, njërin e ka kulturor. Në pozitën e mbështetësit, ALSAR nuk e ka kursyer energjinë, kontributin e prekshëm, për mbarëvajtjen e kongresit”, nënvizoi përshëndetësi.

Mes të tjerash në fjalë, duke vënë në pah mungesën e botimeve të plota të kumtesave të mbajtura në këtë kongres shkencor në vite, z. Mehdi Gurra shprehu gatishmërinë që Fondacioni ALSAR t’i përmblidhte të tëra ato në një botim të vetëm.

Urimi për punime të mbara të kongresit mbylli fjalën e kryetarit të Fondacionit ALSAR.

Kongresi Ndërkombëtar i Materialeve dhe Polimereve i mban punimet deri më 17 shtator.

Kryetari i Fondacionit ALSAR, z. Mehdi Gurra, priti për një vizitë pjesëmarrësit aktivë në veprimtarinë humanitare të shpërndarjes së fidanëve të agrumeve për familje të fëmijëve jetimë.

Vizitorët i shoqëronte koordinatorja e TİKA-s në Tiranë, Emine Gizem Başkan. Studentët turq ishin gjithashtu në shoqërinë e drejtuesit të tyre dhe të agronomit të ardhur nga Turqia.

Të rinjtë aktivistë, të ardhur në kuadër të programit të shkëmbimit të përvojave, mësuan nga mikpritësi, z. Gurra, për aktivitetin e gjerë shumëvjeçar të Fondacionit ALSAR. Ai u foli atyre për vëmendjen e madhe që i kushton fondacioni brezit të ri, formimit dhe përgatitjes së duhur të tij.

Në bisedën e lirshme me vizitorët u fol për veprimtaritë humanitare, për angazhimin në ndihmë të shoqërisë dhe të shtresave në nevojë. Me entuziazmin karakteristik të moshës, studentët e dëgjuan me kujdes fjalën e kryetarit të ALSAR-it dhe përfituan prej saj.

Vizita u mbyll me dhënien e dhuratave dhe bërjen e fotografive të përbashkëta.